Wallhalla

Stute, Hannoveraner, 06.05.1993 – 28.06.2012, dunkelbraun, 174 cm

Wallhalla 06.05.1993 - 28.06.2012

Erinnerung an ein grossartiges Pferd!

Vor 12 Johr besch Du i mis Läbe träte.. Afangs esches ned ganz eifach gsi. Ich no vell zfestgfahre vo mine alte zwoi Ross und Du voller Energie und Tatedrang. Oft hani ghüület gha, hät Dich am liebste umebrocht, aber nei.. mim stuure Grind sei Dank han ich das ned gmacht. Au ned wo Du quer mit mer düre Wald abgsecklet besch und umgheit bisch und ich im wiite Boge devo gfloge be, au ned wo Du bim longiere stiigend uf mich los cho bisch, au ned wo Du jedes mol weni vom Stall ha welle wägriite spötischtens bede Schof kehrt gmacht hesch und entweder hei gsecklet besch oder eifach nur no gstege und hindertsi grennt... Irgendwenn isches besser worde. Vom Stall wäg laufe isch aber nie dini Stärki gsi und das het sich au nie gänderet.

Gsprunge bisch immer wie en Wältmeister. Ich ha mich immer chönne uf Dich verloh. Du hesch mi dür dLizänz brocht und mer mini erschte R1 Klassierige gschänkt. Vo Der us hättemer no höcher chönne go, aber ich han zemli de Schiss die Hose gha und gfunde, Dressur isch weniger gföhrlich So hesch Du mich de au no dür dDressurlizenz gschleipft und mer hend de erschti L-Sieg scho zemli schnell döffe fiire. Obwohls zerscht gheisse het „was wotsch au mit dem Springross ide Dressur". Mer hend üs nie lo unterkriege, ich han mis Läbe lang immer a Dich glaubt. Du besch zu mim Härzensross worde, ich han Der blind vertraut.

De Höhepunkt vo Dinere sportliche Laufbahn isch klar de M-Start gsi wo Du scho trächtig gsi besch mitem Lalli. Leider hets knapp ned füre Klassierig glängt, trotzdem ben ich super stolz gsi dass mer's so wiit gschafft hend. Allne andere zum Trotz...
Es sind gsundheitlichi Tüüfpünkt cho, wo üs zemli zruggrüehrt hend..vo Pontius zu Pilatus beni mit der gfahre um usezfinde, was mit der los isch. Eine het üs de ändlich chönne hälfe....hüt ischer dank Der mi Ehema. Alles was ich hüt han isch nur Din Verdienst. Ich bi Der vo Härze dankbar defür.

Du hesch mer noch Dinere sportliche Laufbahn 3 super tolli Fülli gschänkt. Sie bedütet mer sehr vell und erinnered mich jetzt jede Tag a Dich.
Mer chömid oft Träne weni elei be, ich chan das alles no gar ned rächt begriife..es duet mer so weh, ich han Der no so vell Johr do be üs gwünscht. Es esch so unerwartet cho. Es esch eifach unfair. Jedes mol weni i Stall gange stelli mer vor wie Du vor mer stohsch und mer zue wieherisch. Ich has no so genau im Ohr dis Wiehere. Ich hoffe, ich vergisse das nie.

Es duet mer leid Walli, dass ich i Dinere Not ned a dinere Siite gsi be.. alles hät ich defür gä, Dich uf dim letschte Wäg chönne zbegleite.. Ich hoffe, Du bisch mer deswäge ned bös.

Mis liebschte Walli, ich danke Der für all die schöne Johr, für dini Geduld mit mir, für Din Kampfgeist, für dini Fohle wo Du mer gschänkt hesch. Danke, dass Du immer für mich do gsi besch und mis Läbe so positiv beiflusst hesch. Irgendwenn gsämmer üs weder... ich bin in Gedanke immer be Der und Du wirsch immer en bsonderige Platz i mim Härz ha. Ich vermisse Dich....

 

 

 Willem’s As

Watzmann

 

 

Peggy

 

 

 Arnika

Adlerflügel

 

 

Akki

 

 

Am Morgen vom 28.06.2012 haben wir unsere Zuchtstute Wallhalla (tragend von Johnson) mit einem Zwerchfellriss tot auf der Weide aufgefunden. Wallhalla war Corinne's ehemalige Sportstute und ihr Herzenspferd. Wir sind alles sehr sehr traurig über diesen schweren Verlust. Sie wird in unseren Herzen für immer einen besonderen Platz behalten und in ihren drei Fohlen weiterleben. Danke für alles Walli!

Nachkommen:

2007 C.S. Love's Divine v. Laudabilis

2008 Rietenberg's Guardian Angel v. Gribaldi

2011 Rietenberg's Libretto v. Lord Sinclair III

 

LegetøjBabytilbehørLegetøj og Børnetøj